Navigate / search

Aaja Statsministerimut: Kalaallit Nunaata ineriartornissamik kissaateqarnera Danmarkip kigaallassassanngilaa.

Ullumikkut Inuit Ataqatigiit sinnerlugit Folketingimi ilaasortap Aaja Chemnitz Larsenip Statsministeri Lars Løkke Rasmussen ataatsimeeqatigivaa, tassanilu qinersinerup kingorna naalakkersuisut tungujortut pilersinneqassagaluarpata Kalaallit Nunaata Folketingimi atuuffianut tunngatillugu peqatigiinnit qanoq isiginninneq eqqartorneqarpoq. Aajamit oqariartuut ersarippoq: peqatigiinneq naligiiffiusoq, tassanilu Danmarkip Kalaallit Nunaata ineriartornissaanik akornusiinani tapersersuissasoq.  

Folketingimut qinersereernermi kina Statsministerinngussanersoq suli nalunarpoq. Nalorninaatsorli tassaavoq qinigaaffimmi matumani Kalaallit Nunaat aatsaat taamak angusarissaartigimmat, tamannalu folketingimi ilaasortap Aaja Chemnitz Larsenip Kalaallit Nunaannut tunngasutigut folketingimi sulianut peqataalluarnera naalakkersuisuniillu tusaaniarneqarneruneq patsisaapput.

 

”Kalaallit Nunaata inissisimaffia aallaavigalugu politikkimut tunngasutigut Danmarkimut pingaaruteqarnera annikinaarneqarsinnaanngilaq. Taamaattumillu Kalaallit Nunaata Namminersorluni Oqartussaaffiunerata ineriartorteqqinnissaanut Danmarki tuaviuuteqanngilaq. Danmarkimut naligiimmik peqateqarluta Kalaallillu Nunaata ineriartortinnissaa anguneqassappat, taava ukiuni aggersuni suleqatigiilluarnerup nukittorsaqqinneqarnissaanik anguniagaqarlunga qinigassanngortippunga. Tamanna ukiuni sisamani kingullerni sorpassuartigut angusaqarluarfiulluaqisumik IA-ip sulissutigisimavaa. Taamaattoqassanngippat Naalakkersuisugut assigalugit uninngarusaassaagut.” Aaja Chemnitz Larsen oqarpoq.

 

 

Aaja Chemnitz Larsen meeqqat misileraarutaasut pillugit utoqqatsertoqarnissaanik Folketingimi aalajangiiffigisassatut siunnersuuteqarsimavoq. Tamannalu aallaavigalugu Statsministerip aamma Naalakkersuisut Siulittaasuata peqqusinerisigut suliassap nassuiarneqarnissaanut oqaluttuarisaanerullu tamatuma nalunaarusiarineqarnissaanut suliassamik pilersitsisoqarpoq.

 

”Ataatsimut oqaluttuarisaanitsinni pisut ilaat kanngusuummernarluinnartuupput. Assersuutigalugu sumi inunngorsimaneq aallaavigalugu akissaasersuisimanermut, ullutsinni akissaatitigut nikingasitsinermut aamma misileraanermut taamaattumut tunngasutigut. Tamakkua dansk-kalaallillu oqaluttuarisaaneranni pisuupput akuersaarneqarsinnaanngitsut pitsaanngilluinnartuusullu. Taamaattumik meeqqat misileraatigineqartut suli akunnitsinniittortaannut Statsministerip oqaloqateqarnissaanik inassuteqarsimavunga. ” Folketingimi ilaasortaq naggasiivoq.

 

Ataatsimiinneq ullumikkut pisoq tassaagunarpoq Statsiministerip Aaja Chemnitz Larsenillu qinersisoqannginnerani ataatsimiinnerat kingulleq. Politikerilli taakkua marluk 10. maj Folketingip inersuaani Naalagaaffeqatigiinneq pillugu ukiumoortumik oqallinneranni naapeqqissapput, tamatuma siornatigut qinersinissaq suaarutigineqanngippat.

Print Friendly, PDF & Email