Navigate / search

Aaja: Politikkimi piumassuseqqortunerput ataqatigiinnerpullu sumiippa?

Asseq: Inuit Ataqatigiit Folketingimi

Asiip Kommuneqarfik Sermersuumit borgmesteritut tunuarneranit kinguaassiutitigut innarliinernut sullissisumik pingaarnertut inissisimasumik annaasaqarpugut. Partiinik assersuusiornermillu tunuliaqutilerluta politikkimik ingerlatsinerput qaangertariaqarparput pimoorussillutalu meeqqat atugarissaarnerunissaat sulissutigilerlugu. Uanga isumaqarpunga maannakkorpiaq oqaatsit iliuuseqarnermut taarserneqassasut.

Oqaluinnarnermit iliuuseqarniarutta uungaannaq tunngasunik oqallitiinnarnata ingerlatsissaagut

Kisitsisit atorlugit nassuiaasiornerit ersarissumik takutitsipput: Kingumut qiviassagutta meeqqat inuusuttullu tamarmik 43%-ii kinguaassiutitigut innarlerneqartarnikuupput. Ullumikkut kisitsisit taakku 20%-imut apparnikuupput. Taamatut allanngortoqarnerata politikkikkut iliuuseqarnerup allannguisitsisinnaanerata takutippaa. Politikkikkulli oqallinnerit sakkortusinikuupput ukiullu kingulliit aamma unittoortarnikuullutik. Tamanna naammaleqaaq. Tamanna maannakkut piviusunngussanngilaq. Uanga oqallinnerit iliuuseqarnissamit unitsitsinnginnissaat qanoq pingaaruteqartiginersoq erseqqissartariaqarpara.

Inuit ilaasa kinguaassiutitigut innarliinerit kulturitsinnut atassuteqarnerarlugit oqarnera ingasagivaat. Inuit nammineerlutik tassunga isumaqataasinnaapput imal. isumaqataanatik. Uangali inuttut isumaqarpunga maanna inuusuni kinguaariinni 43%-it tungaanut kinguaassiutitigut innarlerneqarnikuusimappata inuiaqatigiinni tamanna ajornartorsiuterujussuusoq. Tamanna ataatsimut nassuerutigisariaqarparput pikititsilersitsillutalu taamaalillutalu kinguaassiutitigut innarliinerit siumut pinngitsoortinniarsaralugit.

Uanga paasisakka malillugit kulturi tassaavoq tamatta ineriartortillugulu assigiinngitsunut saasarsinnaasarput. Ineriartornerup taassumap meeqqanut inuusuttunullu atugarissaarnerunermik kinguneqarnissaa kissaatigaara isumaqarlungalu kinguaassiutitigut innarliinerit qanga pisunut ilaasutut isigisassaasut. Taamaammat aamma oqallinnerni piviusumik ajornartorsiummit iliuuseqarniarnerup unitsinnginnissaa pingaartissavarput. Taakku saniatigut uagut politikerit iliusissanut suleqatigiissinnaanernullu takkunnissinnaasariaqarpugut – tamannalu ullumikkut aqaguunngitsoq anguniartariaqarlugu.

Print Friendly, PDF & Email