Navigate / search

Aaja: Partii Naleqqami piviusorsiulersimapput

Partii Naleqqap 2021-miit namminersulivinnissamut piumasaqaateqarnertik maanna taamaatippaat, Kalaallit Nunaatalu aningaasatigut nukittorsarneqarnerusariaqarnera pisariaqartinneqartoq nassuerutigalugu. ”Paasinninneq pingaaruteqartoq – eqqortorlu”, Inuit Ataqatigiit folketingimut qinigassanngortitaa Aaja Chemnitz Larsen isumaqarpoq.

”2021-mi namminersulivinnissap piviusunngorsinnaannginneranik ersarissumik nassuerutiginninneq pillugu, kiisalu namminersulivittoqarnissaanut nunatta aningaasatigut ullumikkorniit nukittunerungaarnissaanut qajannaannerunissaanullu paasinninneq pillugu Partii Naleraq aamma Pele Broberg nersualaarusuppakka. Taamaasillutik Partii Naleqqamiit piviusorsiortumik alloriartoqarpoq. Neriuppunga Partii Naleqqap taamatut paasinninnertik attatiinnassagaa, taamaasillutami Kalaallit Nunaata inissisimaffivia aallaavigalugu assigiinngissitaarnerusumik piviusorsiornerusumillu oqallissinnaanerulissagatta”, Aaja Chemnitz Larsen oarpoq.

”Partii Naleqqap nersualaarneqartariaqarneranut nunatsinni ersarilluinnartumik unammilligassaqartuunerput aallaavigivara: Meeqqanik atornerluinerit, pinerlunnerpassuit inunnik uloriarnartorsiortitsisuusut, atornerluisorpassuit, inissaaleqinerujussuaq, ikiuutinik pisariaqartitsisorpassuit, pisortani atorfillit amerlavallaarujussuartut namminersorlutillu inuussutissarsiutini ikippallaartut. Tamakkua tamarmik kattullutik sakkortulluinnartuupput. Taavalu inuit ikittunnguunerput nunarujussuarmilu attaveqarniarnikkut ajornakusoortumiinnerput qaavatigut eqqarsaatigissagaanni – ukiorpassuarnilu akisussaaffinnik angerlaassisimannginnerput – ila aqqutissarput takeqaaq. Namminersulivinnissamut oqalinnermi piviusorsiorneq maqaasisimava”, Aaja Chemnitz Larsen naqissusiivoq.

”Partii Naleraq aallartikkamili nunap inissisimanivianut atatillugu kukkusumik piuartumillu oqallinnermut peqataasimavoq, taamatullu namminersulivipallannissamik piviusorsiunngitsumik neriuuteqartitsisimalluni. Maanna allatut isumaqalernermikkut politikkitigut piviusorsiornerusumut sangupput, tamannalu nuannaarutigaara. Tamanna nunatta innuttaasuttalu siunissaannut tunngasutigut pitsaanerusumik piviusorsiornerusumillu oqallinnissamut neriuuteqalersitsivoq.”

Pingaartumik naalagaaffinngornissami ”aningaasaqarnikkut illersorneqarsinnaasaqarnissap” taamatullu namminersulivinnermi inuit inuunerminni atugaasa ajornerulersinneqannginnissaat Partii Naleqqap paasilluarsimammagu maluginiarpara. Taamaasillutik Nunatta Qitornaasa aamma Vittus Qujaukitsup, suli Kalaallit Nunaata namminersulivikkuni aatsaat pisuunngorumaarneranik inunnut oqalunnerannut, ersarissumik tunuartiterput. Taamatummi oqalunneq tupinnarluinnartuuvoq – nunatta Ruslandimut imaluunniit Kinamut tunineqarnissaa aallaavigineqarsimanngippat. Partii Naleraq alloriarluarpoq. Maannalu Siumukkormiut apeqqummut matumunnga qanoq isummernissaat amigaatigiinnalerpara”, Aaja Chemnitz Larsen naggasiivoq.

Print Friendly, PDF & Email