Navigate / search

Aaja: Naalakkersuisut akisussaaffimmik qimarratiginnipput

Asseq: Inuit Ataqatigiit Folketingimi

”Namminersulivinnissamik nammineerlunilu aalajangiisinnaassuseqarnerunissamik oqaluttoqarsinnaanngilaq – kinguninngalu sunniuteqarsinnaanermik tunutsilluni, aalajangigassanullu ajornakusoortunut Danmarki aalajangiisussanngortillugu akisussaaffimmik tamakkiisumik qimarratiginnilluni. Namminersorluni Oqartussaaneq suleqatigiinnissamik isumaqartinneqarsimavoq, maannali innuttaasut sallunaveeqqutitut inissillugit aporaannernut akisussaaffinnillu tunutsinernut aallaavinngorsimavoq.”

Taamatut oqarpoq Inuit Ataqatigiit sinnerlugit folketingimi ilaasortaq, Aaja Chemnitz Larsen.

”2000-imili Danmarkimiit aalajangersagaq ilaatigut qimaasunik tigusisinnaanermut tunngasoq Kalaallit Nunaanniit akuersissutigineqarpoq. Qimaasunut tunngasut Kalaallit Nunaat sinnerlugu Danmarkimiit aqunneqaraluarput – kisiannili politikkikkut aalajangiisinnaatitaaneq Kalaallit Nunaanniippoq soorlumi Folketingimi pisanut tunngasut tamarmik taamaattut. Tamanna Inatsisartuni amerlanerussuteqartut aalajangerpaat, peqqussummilu nr. 50 23. februar 2011-meersumi nassaassaavoq.

”Uannit isigalugu matumani ajornartorsiutaasut marluupput: Najugaqarfissamut atatillugu Naalakkersuisut Kommuneqarfik Sermersuumut piffissaatillugu nalunaarsimannginnerat. Inuk ataasiinnaq pillugu suliassami annikitsuinnarmi kukkuluttorneq tamanna pisinnaappat, taava pisani annertuuni pisariusunilu Naalakkersuisut qanoq kukkuluttorsinnaatiginissaat eqqaanerluunniit sapingajappara”, Aaja Chemnitz Larsen oqarpoq nangillunilu:

”Ajornartorsiutaasup aappaa pisamut tunngaviusumik tunngasuunerusoq tassaavoq, Kalaallit Nunaanniit Flygtningenævnimi, Qimaasunut Ataatsimiititaliami, ilaasortamik toqqaasoqarsimammat, qimaasumullu pineqartumut suliaq ukiorpaalunngortuni ingerlareersimammat taamaattumillu politikkikkut iliuuseqarnissamut tamanik periarfissaqartoqarsimagaluarmat. Iliuuseqartoqarsimanngilaq, ajornartorsiullu ilimasaareqqaarani Kommuneqarfik Sermersuumut kaamiinnaraanni, taava Danmarkip Kalaallit Nunaat qulaatiinnarlugu aalajangernerisaatut pisuusaartinneqarpoq. Tamannali ilumuunngilaq, uteqattaaraluaraanniluunniillu ilumuulernaviarnani.”

”Oqaatiginiagaralu tassaavoq, nunap aqutsisui iliuuseqarnissaminni tamatigut sinippaarsimagunik silatusaartumillu iliuuseqaratik, kingornalu Danmarki pisuutiinnarlugu, taava isumaga naapertorlugu tamanna naalakkersuinikkut inerisimannginneruvoq nunatta ineriartornissaatigut annertuunik pilersaarusiornernut naapertuutinngitsoq.

Inuusuttoq angerlarsimaffik qimallugu namminiilersoq aamma namminerisimanik toqqaasinnaalersarpoq, toqqakkanilu akisussaaffigalugit. Imaappasipporli, Naalakkersuisut tamakkiisumik aalajangiisinnaassuseqalerusuttut, sunniuteqarsinnaalerusuttut suullu tamaasa isummatik naapertorlugit aaqqissuukkusukkaat – sunniuteqarnissaminnulli iliuuseqarnissaminnullu periarfissinneqarunik iliuuseqanngitsoorlutillu, taava Danmarki pisuutissavaat. Tamanna inerisimannginneruvoq kusanaranilu, nunallu aqutsisui allanut tikkuartuiinnaratik akisussaaffeqarnerusutut piffissaagallartillugulu iliuuseqartartutut pissuseqaraluarpata namminiilivinnissamut apeqqut uppernarnerussagaliarpoq. Pisoq Danmarkip tusaamaneqarneranik innarliisutut isumaqarfigaara, taamatullu suleqatigiinnermut akisussaassuseqarnermullu takutikkusutatsinnut annertusarniakkatsinullu ajoqusiinerulluni”, Aaja Chemnitz Larsen naggasiivoq.

Print Friendly, PDF & Email