Navigate / search

Aaja: Naalakkersuisunit silap pissusaata allanngoriartorneranut misiarneq ernumanarluinnarpoq

 

Aaja Chemnitz Larsenip, Inuit Ataqatigiinnit Folketingimi ilaasortaq, Inuussutissarsiornermut Nukissiuuteqarnermullu naalakkersuisup Aqqalu Jerimiassenip (A) inuit iliusaannit silap pissusaata allanngoriartorneranik akuerinnikkumannginnera isornartorsiorfigaa:

 

“Ilumoortumik tupannaqaaq, pakatsinaqaaq assullu pimoorussinnginnerujussuulluni. Nunarsuarmi allanut sanilliulluta nunani issittuni silap pissusaata allanngoriartornera toqqaannartumik maluginerpaavarput taamaattorli Kalaallit Nunaanni inuit iliusaannit silap pissusaannik allanngoriartortoqarneranik akuerinninngitsumik naalakkersuisoqarluta ass. nukissiuuteqarnermut naalakkersuisuusumik. Tamanna ernumanarluinnarpoq.”

 

“Aalisartuutigut piniartuutigullu ukiuni hundredikkuutaani avatangiisini sakkortoqisuni inuusarnikuupput ukiunili makkunani iliuuseqarfigineqarsinnaarpianngitsumik inuuneri allanngoriartorlutik. Naalakkersuisumik ilisimatuunik pimoorussilluni upperinninngitsumik ilaqarluni ernumanarluinnarpoq, Aqqalu Jerimiassenilli inuussutissarsiutitta pingaarnersaat, tassa inuussutissarsiornerup iluani aalisarneq ernumaginngikkaa Kalaallit Nunaannut ulorianaateqarluinnarpoq. Inunniimmi silap pissusaata allanngoriartorneranik paasisat akuerineqanngippata politikkikkut aaliangiinerni allannguisinnaanerit aamma matuneqassapput.”, Aaja Chemnitz Larseni oqarpoq.

 

“Ilisimatuut tamangajammik nunarsuarmi isumaqatigiipput. Kalaallit Nunaat ukiorpassuarni sikukkut misissuinernut tunniusimasuunikuuvoq. Imartatsinni kiassuseq allanngoriartorpoq, sermeq aakkiartorpoq, uumasut uumasinnaaneri allanngoriartorput, ukiukkut aasakkullu silap pissusaa allanngoriartorpoq – nunanilu issittuni allani, soorlu Amerikap avannarpasissuani Ruslandimilu qeriuaannartut peerunnikuupput taassumallu kingunerisaanik kissatsikkiartupiloorneq takkulluni. Uannut erseqqarilluinnarpoq qanoq silap pissusaata allanngoriartornera malunnaateqartiginersoq ilisimatusarnerullu tungaatigut takussutissat ersarilluinnarlutik, tassami takutippaat pisoq inuit iliusaannit pinngortinneqartuusoq. Taamaammat aamma silap pissusaata allanngoriartornera maannakkut allanngortikkumallugu nammineerluta aamma mumisitseqataasinnaavugut.”

 

“Kalaallit Nunaanni naalakkersuisunik ajornartorsiutinik pimoorussisunik pisariaqartitsivugut. Inuussutissarsiornermut Nukissiuuteqarnermullu naalakkersuisoq Aqqalu Jerimiasseni ilisimasaqarnerusut akerlerivai oqallinnermullu pingaaruteqaqisumut ajornerusumut saatsitsilluni. Taakku saniatigut politikkikkut sulinermut tatiginninneq annikillisissavaa, soorlu aamma nunami aqutsisut aqutsinerannut tatiginninneq annikillisitsisinnaalluni. Uanga isumaqarpunga Naalakkersuisuni siulittaasup silap pissusaanik pingaartitsisup, Kim Kielsenip, ministeri akueriinnassanngikkaa imal. naalakkersuisuni taarsiissasoq. Taamaaliornikkut Kalaallit Nunaannit silap pissusaannik allanngoriartornermut nunarsuarmut tamanut attuisuusumut, pingaartumik uagutsinnut nunani issittuniittunut eqquisuusumut, isumarput pimoorussinerpullu qularineqarnavianngilaq”, Aaja Chemnitz Larseni naggasiivoq.

Print Friendly, PDF & Email