Navigate / search

Aaja ministeriunermut apeqqarissaartoq: Kalaallit Nunaannut danskit inatsisaat nutaanngilisimasoq ajornartorsiutaavoq

Asseq: Inuit Ataqatigiit Folketingimi

Ullumikkut ministeriuneq Lars Løkke Rasmussen (V) folketingip inersuani apeqqarissaarfigineqarpoq, Atlantikullu avannaaniit ilaasortat sisamaasut sulianut tunngasutigut apeqqarissaarput. Aaja Chemnitz Larsenip (IA) ministeriunermut apeqqarissaarnermini Inuit Ataqatigiit folketingimi pingaarnertut suliniutaannut tunngasunik killiffissiuivoq, tassalu Kalaallit Nunaannut danskit inatsisaasa nutaanngitsut nutarsarneqarnissaannut suliamut tunngasutigut.

Naalakkersuisuni partiit pingasut peqataaffigisaanni naalakkersuinermi tunngavigisaq 2015-meersoq ilaatigut siunertamik imaattumik imaqarpoq: ”Naalakkersuisut Savalimmiunut Kalaallit Nunaannullu inatsisinut danskit akisussaaffigisaannut nutarterinissamik salliussinerussapput ” Danskilli naalakkersuisui suliami tassani sumut killippat? Naalakkersuisullu Kalaallit Nunaannut danskit inatsisaasa nutaanngilisimasut nutarterneqarnissaannut kissaataat nutarterinermut qanoq sunniuteqarsimava? Aaja Chemnitz Larsenip ullumikkut apeqqarissaarnermi ministeriunermit akissutissarsiumasai ilaatigut taakkuupput.

”Ajoraluartumik Kalaallit Nunaannut folketingip inatsisai atuuttut nutaanngilisimasorpassuupput. Inatsisillu nutaanngilisut kalaallit inuiaqatigiit ineriartorfissaannik kigaallatsisarput. Ilaatigut Meeqqanut Inatsit kiisalu Silaannakkut angallannermut inatsit 1960’kkornisat pineqarput. Ataatsimut isigalugu inuiaqatigiinnut nutaaliaasunut naleqquttunngorlugit inatsisit atuuttut nalilersorneqarlutillu nutartigassaapput”, folketingimi ilaasortaq Aaja Chemnitz Larsen ministeriunermik apeqqarissaarfik pereermat oqarpoq.

Imalu nangippoq: ”Inatsisit nutaanngilisut Folketingimiillu isumagineqartut naammaginannginnerisa ministeriunermiit akuersorneqarnerat pitsaasuuvoq. Ajoraluartumik inatsisit attuumassutillit nutarterneqarnerat sukkaappallaarpoq, soorlu kingornussinermut inatsimmi nutarterineq sivitsorluinnartoq takusinnaagipput. Taamaattumik qinigaaffimmi matumani folketingimi inatsisit ataatsimut naliliiffigineqarnissaannut naalakkersuisut piumasaqarfigissavagut.”

Print Friendly, PDF & Email