Navigate / search

Aaja: Meeqqanut inuusuttunullu atornerlunneqartunut ikiuigasuarnissamut aningaasaateqarfik

Inuit Ataqatigiit sinnerlugit folketingimut qinigassanngortittup Aaja Chemnitz Larsenip meeqqannut inuusuttunullu kinguaassiutitigut atornerluinerit eqqarsaatigalugit iliuuseqarnissamut ikiorasuarneqarnissaannullu qulakkeerisussamik aningaasaateqarfimmik pilersitsinissaq kajumissaarutigivaa.

”Aalisartut ikiorasuarneqarnissaannut aningaasaateqarfiliorsinnaagutta, taava sooq meeqqanut atornerlunneqartunut taamatut pilersitsisinnaassanngilagut”, Aaja Chemnitz Larsen aperivoq.

”Inoqarfippassuarni inunnut ikiuinikkut ikiortariaqavissutut sivisuumik inissisimasoqarsimavoq, soorlu Tasiilami, aammalumi sumiiffinni allani tamanna takugipput. Taamaattumik massakkorpiaq arlalissuartigut iliuuseqartoqartariaqarpoq, Aaja nangilluni oqarpoq.

IA-p qinigassanngortitaata tigussaasutut siunnersuutigivai:

  • Iliuusissanut pisariaqartunut aningaasassaqarnissaq qulakkeerniarlugu Ikiuigasuarnissamut aningaasaateqarfimmik pilersitsinissaq
  • Eqqartuussivikkut suliat pilertornerunissaat atornerluisutullu nassueruteqarnermi ingerlaannartumik pineqaatissinneqartarnissaq. Suliassat ukiuni arlaqartuni uninngatinneqartassanngillat
  • Angajoqqaatut piginnaasat qaffassarnissaannut ilaqutariinnut 0-miit 2-nut ukiulinnik meerartalinnut kostskoleliornissaq. Tamanna danskit aningaasaateqarfii suleqatigalugit pilersinneqarsinnaavoq
  • Suligasuartitatut angalatittagassanik pilersitsinissaq, atorfeqarnikkut pitsaasunik atugaqartunik naapertuuttunillu suliamikkut ilisimasalinnik
  • Innuttaasut eqqugaasut tamaasa paasisaqarfiginissaat, ass. nuunnissamut, qanoq ikiorserneqarnissamut, psykologimik oqaloqateqarnissamut il.il. pisariaqartitaat paasiniarneqarlutik, neqeroorfigineqarasuarnissamullu piginnaatitaaffilerlugit.
  • Ataatsimut iliuuseqarnermi ilinniagaqarnissaq, sumiiffinni suliffiit nutaat pilersinneqarnissaat pitsaanerusunillu neqeroouteqarnissat ilaassapput
  • Meeqqat ornittagaat Armangivat kommunemiit ingerlatsinermut taperneqassaaq, tassa ulloq unnuarlu ammasinnaanngortillugu akissarsinerullu nalaani orniguffissatut inissillugu
  • Danmarkimiit aningaasatigut taperserneqarnikkut meeqqanut illut meeqqanut sumiginnakkanut atornerlunneqarsimasunullu katsorsaaffiusinnaanut pilersinneqartariaqarput

”Kinguaassiutitigut atornerluinerit kinguaariit ingerlaneranni piuarnerat nunatut ajorluinnartumik ajornartorsiuittutullu inissisimatitsivoq. Inuunerit sequminneqartarput, inuit atornerluisunngortarput imminornerillu pisarlutik, tamannalu nunatut ajornartorsiuittutut inissisimalersitsivoq. Naalakkersuisut aalajangiisinnaassuseqartut iliuuseqarsinnaasullu, taamatullu oqallinnermi taqissimanngitsut ajornartorsiutinillu kommuninut kaamiiginnanngitsut maqaasivakka”, Aaja Chemnitz Larsen naggasiivoq.

 

Print Friendly, PDF & Email