Navigate / search

Aaja meeqqanut inunnillu isumaginninnermut ministerimut oqariartuuteqarpoq: Inunnik isumaginninnikkut iliuutsit ataatsimoorussatut pitsaanerusumik toraassavagut

Asseq: Inuit Ataqatigiit Folketingimi

Inuit Ataqatigiit folketingimi ilaasortaatitaata Aaja Chemnitz Larsenip ullumikkut meeqqanut inunnillu isumaginninnermut ministeri, Mai Mercado, ataatsimeeqatigivaa. Ataatsimiinnermi Aaja Chemnitz Larsen susassaqarfiup tamassuma iluani Inuit Ataqatigiit qanoq politikkeqarnerannik kissaateqarnerannillu oqaluttuussivoq. Ilanngullugulu Meeqqat pillugit Kalaallit Nunaannut inatsisip nutarterneqarnissaanik ministeri eqqaasippaa.

Inuit Ataqatigiit folketingimi ilaasortaatigisartagaannit ukiut ingerlanerini inunnik isumaginninnermut tunngasut ilungersuutigineqartarsimapput, kingullertigullu partiip sulissutiginninneratigut aningaasanik aatsaat taamak amerlatigisunik, 36,4 mio. kr-inik, kalaallinut Danmarkimi inooqataanikkut ajornartorsiortunut aningaasaliisoqarpoq. Aningaasat 2016-mi ukiakkut Satspulje aqqutigalugu immikkoortinneqarput, maannalu timitalerneqariartuaarlutik.

Aaja Chemnitz Larsen itisiliivoq: ”Inuit Ataqatigiit tungaanniit kalaallit Danmarkimiittut inooqataanermikkut ajornartorsiortut atugaasigut pitsanngorsaanissaq sulissutigisimavarput. Folketingimiit kalaallinut Danmarkimiittunut inooqataanermikkullu ajornartorsiortunut aatsaat taamak annertutigisumik satspulje aqqutigalugu aningaasaliisoqarnissaa qulakkeerniarsimavarput. Taamaattumik meeqqanut inunnillu isumaginninnermut ministerip ataatsimeeqatiginerani 36,4 mio. kr.-it timitalerneqariartuaarneqarnerannut tunngasunik pissusissamisoortumik apeqquteqarsimavunga. Ministerip Nunarput pillugu Ataatsimiitiliaq tamanna pillugu paasissutissiiffiginiarpaa, tamannalu politikkikkut pingaarnersiuilluni tulleriiaarinermi salliutinneqartariaqarmat nuannaarutigivara.”

Kalaallinut Danmarkimi inooqataanikkut ajornartorsiortunut iliuusissiaq ingerlasimasoq 2016-imi atorunnaarpoq, Aaja Chemnitz Larsenillu inunnik isumaginninnikkut ministeriusarsimasut ataatsimeeqatigisarnerisigut folketingimilu partiit oqaaseqartartuisa suleqatiginerisigut suliaqarsimanermi kingunerisaattut iliuusissiap nutaap aallartinnera tulluusimaarutigivaa. 36,4 mio. kr.-it saniatigut Kalaallit Nunaanni Danmarkimi naalakkersuisut suleqatigiinnissaanni ilisimasatigut avitseqatigiinnissamut 10 mio. kr.-it immikkoortinneqarsimapput.

Aammattaaq Aaja Chemnitz Larsenip susassaqarfiup tamassuma kisitsisaatigineqannginnera saqqummiuppaa. 2012-mi kalaallit Danmarkimiittut 6-20%-ii inooqataanermikkut ajornartorsiuteqartuusut Socialstyrelsemiit nalilerneqarpoq, soorlu aamma kingorna misissuisarnerit takutikkaat inunnik isumaginninnerup iluani kisitsisaatit naapertorlugit kalaallit amerlasuut pineqartut. Kalaallit Danmarkimiittut pillugit eqqortumik tamakkiisumillu paasissutissaateqarnissaq pillugu nutaanik kisitsisaateqarnissaq pingaaruteqarpoq, aamma kalaallit ingerlalluartuusut pillugit.

Aaja nassuiaavoq: ”Pineqartussat kikkuunersut ilisimasariaqarpagut, taamaattumillu kalaallit Danmarkimiittut inooqataanikkut ajornartorsiortut pillugit kisitsisinik nutaanik qulakkeerinneqqulllugu ministeri kajumissaarpara. Kisitsisit pigisat qanganisaapput nalorninartortaqarlutillu. Kalaallit Illui kalaallinik Danmarkimi inooqataanikkut ajornartorsiortunik amerliartorneraallutik nalunaaruteqarpata, tamanna qulakkeerinnittumik ilisimasariaqarparput.”

Satspulje-mut isumaqatigiissut uani takuneqarsinnaavoq

Print Friendly