Navigate / search

Aaja: Maanna Kalaallit Nunaanni aningaasarsiornikkut siuariartornissatsinnut periarfissaqarpugut

Kalaallit Nunaat allamut saaqqajaavoq. Nunap atortulersugaanera atorlugu Kalaallit Nunaannut isertitaqarsinnaanerulernermik pilersitsisinnaagutta Kalaallit Nunaanni aningaasatigut siuariartorneq qulakkeersinnaavarput. Statsministeri qanittumi Kalaallit Nunaannut tikeraarami checkimik nassarpoq kissaatigalugulu Danmarkimit Nuummi Ilulissanilu timmisartoqarfinnut alliliinernut aningaasaleeqataasoqarsinnaassasoq. Statsministerip Danmarkimi partiinut siulittaasut naapereerpai maannalu Folketingimi ilaasortaq Aaja Chemnitz Larseni naapissallugu. Naapinneq IA-mit Folketingimi ilaasortanik kalaallinik peqataatitsisalernissamut kissaammit tunuliaquteqarpoq.

Inuit Ataqatigiinnit Folketingimi ilaasortaq Aaja Chemnitz Larseni ullumikkut Statsministeri Lars Løkke Rasmusseni naapeqatigaa qanittumi isumaqatigiissut Statsministerimit Lars Løkke Rasmussenimit aamma Naalakkersuisuni siulittaasumit Kim Kielsenimit atsiorneqartoq pillugu, tassaammat qallunaanit Kalaallit Nunaanni timmisartoqarfinnut alliliinermut aningaasaleeqataanissamut tunngaveqartuusoq. Aajap Statsministeri pingajussaa naapippaa siornatigullu Kalaallit Nunaanni aningaasatigut aningaasaliinerit annerit piviusunngorsinnaasut eqqartortareerlugit, ass. aingaasaliinernut fondinik periarfissat eqqartortarnikuuaat. Statsministerip naalagaaffiup piginneqataasussatut minnertut inissisimanissaa aaliangernikuuaa Naalakkersuisullu ilagalugit ass. Kalaallit Nunaanni aningaasaatinut fondimut aningaasaliinissamut ikiuunnissaq aaliangiullugu. Folketingimi ilaasortap qallunaanit tapiissut ataatsimut isigalugu nuannersumik tiguaa Kalaallit Nunaanni nunap atortulersugaaneranik ineriartortitsinermut siuarsaataasussaammat.

“Namminersorneq pillugu inatsisip oqariartuutaanut angummatissagutta suleqatigiinneq naligiinnerusoq anguniartussaavarput. Naalagaaffiup aningaasaliinissamut fondi assoruussutiginikuunngikkaluarpaat, taamaattorli Kalaallit Nunaanni timmisartoqarfinnut aningaasaleeqataanerit Kalaallit Nunaanni aningaasaliinermut pissutsinik pitsannguinissaa qularinngilara. Aningaasaliisussanut isumannaannermik annermik pilersitsisinnaavoq. Aningaasaliinernut allanut pisoq ammaavoq, ass. utoqqalinersialinnut ineqarnerup  tungaatigut aaqqiissutinut imaluunniit Kalaallit Nunaanni inuussutissarsiornerup tungaasigut aamma periarfissanik ammaasuulluni. Politikkikkut eqqissiviilliornerup Kalaallit Nunaanni inissisimanerput sanngiilliteqqavaa. Periarfissinneqarnerput atunngikkutsigu soqutigineqarnerput annikilleqqissaaq. Inatsisartut oktoberip ingerlanerani timmisartoqarfinnit poortat isummerfigisussaavaat neriuutigaaralu Naalakkersuisut Inatsisartunit kissaatit ataqqissagaat siumullu qallunaat aningaasaleeqataanissaat tapersersorlugu”, Aaja Chemnitz Larseni Statsministeri naapereernerata kingorna oqarpoq.

Inuit Ataqatigiit timmisartoqarfinnut poortamut siunnersuutertik ass. Økonomisk Råd-imit kajumissaarutigineqartoq assigalugu siunnersuipput. Tamanna Nuummi Ilulissanilu timmisartoqarfinnik alliliinernut aningaasatigut atasinnaasumik pilersaarummit tunngaveqarpoq. Inuit Ataqatigiit Folketingimi qangali Danmarkimit aningaasaliinernut annernut tapersiisoqarnissaa tapersersortanikuuaat nalunnginnamikku Danmarkimit Kalaallit Nunaata aningaasaqarnerata nukittorsassagaa, soorlu aamma nunap nammineernerulernissaa soqutigineqartoq nalunagu. Taamaakkalurtoq Naalakkersuisunit pilersitsiniarneq taanna Kalaallit Nunaannit Danmarkimiillu akisussaaffimmik avitsinermik allanngortoqannginnissaa pingaaruteqarpoq.

“Statsministerip nammineerluni Kalaallit Nunaannit Nuummi Ilulissanilu timmisartoqarfinnik alliliinissamut pimoorussinera iliuseqarneralu qujassutigaara maanna piviusunngorsinnaalermat. Qanoq pilersaarnermi nalunaarummi nalilerneqarpoq Kalaallit Nunaanni aningaasat iluanaarutigineqarsinnaasut. Aningaasat taakku atorlugit Kalaallit Nunaanni meeqqat atuarfiinut, inuusuttut utoqqaallu inooqatigiit akornanni sulianut tunngasunut, peqqinnissaqarfitsinnut Kalaallit Nunaannilu inuussutissarsiornermut ineriartortitsinermut atorneqarsinnaapput”, Inuit Ataqatigiinnit Folketingimi ilaasortaq, Aaja Chemnitz Larseni, oqarpoq.

 

Print Friendly, PDF & Email