Navigate / search

Aaja: Kalaallit Nunaanni Pinerluttunik Isumaginnittoqarfik tunulliunneqarpoq

Asseq: Inuit Ataqatigiit Folketingimi

Sapaatip akunnerani matumani danskit naalakkersuisuisa Pinerluttunik Isumaginnittoqarfik pillugu isumaqatigiissutaannut politikkikkut isumaqatigiinniarnerat naammassivoq. Kalaallit Nunaanni Pinerluttunik Isumaginnittoqarfik isumaqatigiissummi ilaavoq. Inuit Ataqatigiit folketingimi ilaasortaatitaata Aaja Chemnitz Larsenip Kalaallit Nunaanni Pinerluttunik Isumaginnittoqarfimmi pitsanngorsaatissat piffissami sivisuumi sulissutigisimavai. Qisuariarporlu Kalaallit Nunaanni malunnaatilinnik pitsanngoriaatissanik ersittoqanngimmat isumaqatigiissut naammaginanngitsoq.

”Inernera Kalaallit Nunaannut pakatsinartuuvoq. Danskit parnaarussiviini pitsanngorsaatissarpassuit taakkartorneqartut kalaallit inissiisarfiini killeqaqisunik iliuuseqartoqarniarneranit Kalaallit Nunaanni inissiisarfiit ajorseriartinneqassapput. Kalaallit Nunaanni pisami tassani kinguleruttoqarsimavoq, iliuusissallu nutaat pineqaratik sipaarniutissat kisimik pineqassappata suli annertunerusumik kinguleruttoqalissaaq.” Aaja Chemnitz Larsen isumaqatigiissut nutaaq pillugu oqarpoq.

Taamaattorli pitsanngorsaatissartaqarpoq. Isumaqatigiinniartut Kalaallit Nunaannik Savalimmiunilllu aallussaqarsimapput, tassanili Nuummi isertitsivissap nutaap pilersinneqarnera siullertut pineqarsimavoq. Tamatuma saniatigut Inuit Ataqatigiit inatsisinik atuutsitsinerup iluani ukiormanna siunnersuumminni inunnut tigummisanut isertitsivinnik pilersitsinissat inassutigisimavaat. Maannalu Nuummi, Sisimiuni Ilulissanilu tigummigallakkanut immikkoortortat sananeqarput. Taakkua pilersinneqarneranni ammasunik isertitsiveqarnissamik isuma tapersersorneqassaaq, tassami tigummigallakkat isertitsivimmiittut allat peqatiginagit inissinneqarsinnaalissammata.  

Aaja Chemnitz Larsen oqarpoq: ”Folketingimi Inuit Ataqatigiinniit takusinnaasatsitut isertitsiviup nutaap aallartilluarnissaanut ilinniartitaaneq, ilinniaqqinnerit inissiisarfinnilu paarsisut tigummiinnarnissaat pisariaqartinneqarput. Tamakkua isumaqatigiissummi ilaatinneqanngillat uggorivaralu. Kalaallit Nunaanilu akuulersitseqqiisarnerup pinerluttartullu taamatullu pinerluffigitittartut ikilisarneqarnissaannut nukittorsaanissat suli pisariaqartinneqarput. Tassanilu isumaqatigiinniartitat Danmarkimi nukittorsaanissaq salliutissimavaat, Kalaallilli Nunaat puigorsimallugu.”

Taamatuttaaq danskit naalakkersuisuisa 2018-imut aningaasanut inatsisissamut siunnersuumminni Kalaallit Nunaanni inatsisinik atuutsitsinerup iluani pitsanngorsaatissanut immikkut 40 mio. kr.-inik inniminniisoqassasoq siunnersuutigisimavaat, tassa Pinerluttunik Isumaginnittoqarfimmut, Eqqartuussiveqarfimmut Politiinullu tamanut atugassatut. Taakkua nunatsinni Naalakkersuisut suleqatiginerisigut piviusunngortinneqassapput, Naalakkersuisummi inatsisinik atuutsitsinerup iluani periusissiami pilersaarusiamilu saqqummiuteqqammerneqartumi pitsanngorsaatissanik arlalissuarnik taakkartuisimapput.

Inuit Ataqatigiit inatsisinik atuutsitsinikkut siunnersuutaa uani takujuk: http://iafolketingimi.dk/gl/politikki/politikkitigut-siunnersuutit-2/kalaallit-nunaat-toqqissisimanarnerusoq-inuit-ataqatigiit-folketingimi-2/

Print Friendly, PDF & Email