Navigate / search

Aaja: Kalaallinut Danmarkimi najugaqartunut inuuniarnermikkut ajornartorsiulersinnaasunut siunnersuineq nukittorsarneqarli

Asseq: IA Folketingimi
Asseq: IA Folketingimi

Ataatsimeersuarneq 8. aamma 9. februar Nuummi ingerlanneqartussaq Aajamiit ammarneqassaaq. Ataatsimeersuarneq Aalborgimi Kalaallit Illuanniit aammalu Aalborgip Kommunianiit aaqqissuussaavoq. Maanna ukiorpaalunngortuni Inuit Ataqatigiit Folketingimi ilaasortaatitarisartagaannit kalaallinut Danmarkimi najugaqartunut inuuniarnermikkullu ajornartorsiulersinnaasunut atugarissaarnerulersitsinissamut tunngasunik sulissutiginnittoqarsimavoq. Kingullertigut ilaatigut Inuit Ataqatigiit politikkikkut uteriisaarneratigut danskit iliuusissanut aningaasanik immikkoortissimasaanniit aatsaat taamak aningaasat amerlatigisut kalaallinut Danmarkimi najugaqartunut inuuniarnermikkullu ajornartorsiulersinnaasunut ukiunullu sisamanut atuuttussatut immikkoortinneqarput, tassalu 36,4 mio. kr.-it, taakkualu saniatigut Kalaallit Nunaata Danmarkillu inunnik isumaginninnerup iluani ilisimasanik avitseqatigiinnissamut 10 mio. kr. –it immikkoortinneqarlutik.

Ukiut tamaasa kalaallit 3-400 missaanniittut Danmarkimut nuuttarput, maannalu kalaallit Danmarkimi najugaqartut katillutik 16.000-iulerput. Taakkua 6-20%-ii tassaapput inuuniarnermikkut ajornartorsiulersinnaasutut inissisimasut. Ajoraluartumik kalaallit ilaat Kalaallit Nunaanniinnerminni ilinniagaqarsimasuullutik atorfeqarlutillu pitsaasumik ingerlasimagaluit Danmarkimut nuunnerminni inuuniarnermikkut ajornartorsiuteqalersarput.

Aaja Chemnitz Larsen, Inuit Ataqatigiit Folketingimi ilaasortaatitaat itisiliivoq: ”Kalaalerpassuarnut Danmarkimi inuulernissaq orniginartutut takorloorneqartarpoq, piviusumili Kalaallit Nunaanniitsillunili piareersarluarsimanngikkaanni initaarnissamut, sulifittaarnissamut imaluunniit ilinniagaqalernissamut naatsorsuutigisat kipusoorsinnaasarput. Ataatsimeersuarnermi matumani kalaallinut Danmarkimut nuuttartunut qajannareerlutillu ajornartorsiulersinnaasunut ikiorsiisussatut piareersimatitat nukittorsaavigineqartariaqarput. Taamatuttaaq Kalaallit Nunaannut uterusuttunut siunnersuinissamik ikiuinissamillu aamma aallussaqarnissarput apeqqutaalluinnarpoq. Pisani tamani Kalaallit Nunaanni Danmarkimilu kommunit suleqatigiinnerisa nukittorsarneqarnissaannik piumasaqaatitaqarpoq, taamaattumillu ataatsimeersuarnerup Kalaallit Nunaanni ingerlanneqarnera assut nuannaarutigaara.”

Kalaallit Nunaanni Danmarkimilu susassaqarfimmi tassani oqartussaasuisa suleqatigiilernissaat ataatsimeersuarnermi siunertarineqarpoq, taamaasillutik kalaallit Danmarkimiittut pitsaanerpaamik ikiorneqarsinnaaqqullugit. Aalborgip kommuniani kalaallinut tunngatitamik immikkoortortaqarfiliorsimapput, tassa immikkoortortaqarfiit attuumassuteqarsinnaasut kalaallinut pisariillisaataasumik katersorlugit. Aaja oqarpoq: ”Aalborgip Kommuniata kalaallinut immikkoortortaliarisimasaa ”9000 Grønland” danskit kommuuniinut allanut maligassiuisuuvoq. Kommuneqarfik Sermersuumik suleqateqarluarnermik assersuutissaqqissuuvoq kalaallit suliffissaaleqisut Aalborgimi pikkorissartitsinerni peqataasimanerat, kingornalu Kommuneqarfik Sermersuumi praktikkilersimanerat.”

Ataatsimeersuarnermi danskit kommuniisa arlaqartut peqataanerisa saniatigut Kommuneqarfik Sermersooq aamma Qeqqata Kommunia peqataapput. Ataatsimeersuarneq susassaqarfimmi tassani iliuusissanut inassuteqaateqarnermik naggaserneqassaaq.

Aamma Danmarkimi Kalaallit Illuisa nittartagaliaat nutaaq ”Kend Danmark” uani alakkaruk: http://www.kenddanmark.gl/

Danmarkimut nuunniaruit aana ilitsersuut; Kendddanmark.dk

Attavissaq: Aaja Chemnitz Larsen, tlf. 0045 61624667

Print Friendly