Navigate / search

Aaja Illersornermut ministerimut oqaaseqaataa: Kalaallit Nunaanni innuttaasut eqqaamassavatit

Asseq: IA Folketingimi

 

Inuit Ataqatigiinnit Folketingimi ilaasortap Aaja Chemnitz Larsenip ullumikkut Illersornermut ministeri Claus Hjort Frederikseni naapippaa oqaluuserisallu ilaanniipput illersornissamut isumaqatigiilernermut piviusunngortitsinissaq, kalaallit qanoq sakkutuunut nunaminni ilanngussinnaalernissaat Kalaallit Nunaannilu upalungaarsimanermut ilinniarfimmik pilersitsinissaq aamma eqqartorneqarluni.

Illersornermut ministeri ullormut naapeqatiginerani Aaja Chemnitz Larsenip kissaatigaa erseqqissarlugulu qanoq kalaallit Kalaallit Nunaanni najugallit Kalaallit Nunaanni Illersornermut suliani ingerlanneqartuni peqataatinnissaat pingaaruteqartiginersoq. Folketingimi ilaasortap ukiaq kingullerli arlaleriarluni ministeri naapittareerpaa Kalaallit Nunaanni innuttaasut sakkutuut suliaanni siunissami peqataatinneqarlutillu ilanngunneqartarnissaat qulakkeerniarlugu. Pisariaqartinneqartoq taanna Aajap qanittumi  juunip aallartinnerani ilisimasaqariartorluni Arsummut Paamiunullu aallarnerani uppernarsineqarpoq. Pingaartumik Arsummi innuttaasut paasitinneqarnerunissaminnik sakkutuunillu oqaloqateqarnerunissaminnik kissaateqarput tassanilu kissaammi sakkutuut Grønnedal-imi Arsuup qanittuani suliaat pineqarlutik.

Kalaallit Nunaanni angalaninni uppernarsivara qanoq inuit sakkutuut suliffiisa eqqaani inuusut peqataatinneqarnissaat pingaaruteqartiginersoq. Paasisinnaavara innuttaasut peqataatinneqarusunneri minnerunngitsumillu najugaqarfimminni susoqarneranik paasisaqarusunneri paasisinnaallugit, assersuutigalugu piniarniaraangamik sakkutuut sungiusarneri apeqqutaatillugit killilerneqartarneri peqqutigalugit.

Taamaammat Aaja Chemnitz Larsenip ministeri siunnersorpaa siunissami sakkutuut suliffiisa qanittuani najugalinnut innuttaasunut najugaqarfinni ataatsimiisitsisaqqullugit, qanorlu illuliat ilaat ingutserneqarneranni avatangiisimi torersaanermut tunngatillugu suut atorneqaqqissinnaaneri pillugit oqaloqatigisaqqullugit innuttaasunut iluaqutaaniassammat.

Folketingimi ilaasortap aamma kissaatigaa naalakkersuisunit paasissallugu Kalaallit Nunaanni upalungaarsimanissamut ilinniarfimmik pilersitsiniarneq sumut killinnersoq. Aajap arlaleriarluni upalungaarsimanissamut ilinniarfissaq innuttaasunut peqataatitsinerunissamik kinguneqartussaq eqqaasarnikuuaa taamaalilluni aamma Kalaallit Nunaanni ilinniarfissat amerlineqarnissaat qulakkeerneqassammat.

Inuit Ataqatigiit Illersornermut siunnersuutaasa ilagaat Illersornermi najugaqarfinnut tunnganerulissasut, tassa Kalaallit Nunaanni upalungaarsimanissamut ilinniarfeqalissasoq. Tamanna aallarnerneqarnissaa nuannaarutigaara inuusuttortagut ilinniarfissanik amerlanernik toqqagassaqalerniassammata Kalaallit Nunaannilu sakkutuut suliaanni inerniliisussanut innuttaasut paasisaat anneruniassammata.

Folketingimi partiit amerlanerit januaarip 28-ani Illersornissamut isumaqatigiissummik isumaqatigiissuteqarput, tassani assersuutigalugu ukiut arfinillit ingerlaneranni 1 milliardingajaat nunani issittuni sakkutuut suliaannut pitsanngorsaanernut ingerlassapput.

Print Friendly, PDF & Email