Navigate / search

Aaja: Folketingimi kalaallit amerlanerit sulilernissaat qulakkeerniarlugu politikki aqqutigalugu ukkatarineqassaaq

 

VIVE-mit kisitsisit nutaat takutippaat 25-it 50-illu akornanni ukiullit suliffeqarnerup iluaniittut 33,1%-iinnai sulisartut. Inuit Ataqatigiinnit Folketingimi ilaasortap kisitsisit nutaat ernumanartippai isumaqarlunilu Danmarkimi naalakkersuisut suliniuteqarnerusariaqarneri pisariaqartut kalaallit amerlanerit suliffeqarnermut atassuteqartinneqalissappata:

 

Ukioq kingullerli kalaallit qassit Danmarkimi sulinersut kisitsisaannik nutaanik piumasaqalerpugut. Kisitsisit taakku piareerput uagutsinnullu erserpoq kalaallit sulilersinniarlugit immikkut iliuuseqartoqartariaqartoq. Uanga kalaalerpassuit Danmarkimiittut sulerusuttorujussuit naapinnikuuaakka. Unammillernartut tassaakkajuttarput qallunaatut piginnaasat annikinneri, Kalaallit Nunaannit ilinniakkat akuerineqannginneri ilinniaqqinnissallu pisariaqartinneqarneri”, Folketingimi ilaasortaq oqarpoq.

 

Kalaallit amerlanerit sulilernissaat qangali Inuit Ataqatigiinni Folketingimi pingaartinneqarnikuuvoq, sapaatillu akunnerani uani Aaja Chemnitz Larseni Suliffeqarnermut ministeri naapippaa kalaallit Danmarkimi sulisarneri pillugit oqalliseqatiginiarlugu. Kisitsisit nutaat isigissagaanni Inuit Ataqatigiinnut kalaallit Danmarkimi suliffeqarnissaannut tunngasut sammineqartussaapput siumullu aningaasat agguagassanik qaffasissusaannik isumaqatigiinniarnernut pingaartinneqarnissaat suliassaallutik.

 

Sapaatip akunnerini takkuttussani aningaasat agguagassat qaffasissusaannik isumaqatigiinniarnerit ingerlanneqassapput tassanilu Atlantikup avannarpasissuanit piginnaatitaasut isumaqatigiinniarnerni ilaasussaanatik. Danmarkimi qaammatini kingullerni pulaarnerit tunuliaqutigalugit inooqatigiinni oqaaseqartittakkat assigiinngitsut partiineersut isumaqatigiinniarnerni ilaasussat oqaloqatigisaqattaarpakka Danmarkimi kalaallit atugarliortut pisariaqartitaat eqqartorlugit. Eqqartugassat akornanni kalaallit suliffeqalernissaat erseqqissarneqassaaq VIVE-mit misissuinerup tamanna aamma tapersersormagu”.

 

Aaja Chemnitz Larsenip ukiamut Folketingimi tusarniaanermi qanoq kalaallit amerlanerit sulilersinneqarsinnaaneri pillugit ilanngussinissani piareersarpaa. Eqimattani kalaallinit inissisimalluarnerit tassaapput takisuunik qaffasissunik ilinniagallit taakkuummata 90%-ii sulisuusut assersuutigalugulu qallunaat akornanni 78%-it sulillutik.

 

Kalaallit amerlanerit sulilersinniarlugit aningaasat saniatigut Inuit Ataqatigiit Folketingimi kalaallinut atugarliortunut Danmarkimiittunut peqqissaanissanut aamma piginnaanernik ineriartortitsinernut oqalutsinik peqalernissaa sulissutigaat.

Print Friendly, PDF & Email