Navigate / search

Aaja: Demokraatit oqaatsitik eqquutsissavaat?

Inuit Ataqatigiinniit folketingimi ilaasortap Aaja Chemnitz Larsenip Demokraatineersoq Randi Vestergaard Evaldsen isumaqatigivaa: Aqqalu Jerimiassenip nammineq isummaminik piffissaanngitsukkut atuuffiminut taputartuussinini pillugu tunuartariaqarpoq.

Nukissiuuteqarnermut naalakkersuisoq silaannaap pissusaata inunnit pinngortinneqannginneranik upperisaqanngitsoq attassinnaanngilarput. Ilaatigut ilisimatusarnikkut paasisanut tamanna ersarilluinnartumik akersuuppoq, aammali innuttaasutut politikerisullu pissutsinut akiuunniarsinnaannginnerput oqaatigineqarpoq. Aqqalu Jerimiassenip isumaa naapertorlugu ingiinnarluta pinngortitap allatut iliuuseqarnissaa utaqqerusaaginnassavarput, tamannalu assersuutigalugu aalisarnikkut inuutissarsiutitta – Kalaallit Nunaata pingaarnertut inuutissarsiutaata – sumulluunniit atorsinnaanngilaa. Maani nunatsinni nunallu tamalaat akornanni inuit pilersitaattut silaannaap allanngoriartornerata sunniutai tamatta annikillisarniassavagut, uagummi Issittumi najugaqartuusugut toqqaannartumik maluginersaavagut.

Taamaattumik Randi isumaqatigaara –silaannaap allanngoriartorneranik upperinninngitsumik nukussiuuteqarnermut naalakkersuisoqarsinnaanngilagut. Assigiinnassavaa aningaasat naatsorsuutillu nunamut pingaaruteqannginnerannik upperinnittumik aningaasanut ministereqarutta. Tamanna pimoorussinerunngilaq, isigineqarnitsinnut akornutaavoq inuusuttatsinnullu sianiitsoosorinnittumik oqariartuutaalluni.

Kisianni Demokraatit Aqqalu Jerimiassenimik Nikkulaat Jerimiassenimillu isornartorsiuinerminnik ilumut pimoorussissanersut pissangagagivara. Randip naalakkersuisooqatigiinnut tapersersuinertik tunuartissavaa? Tamanna pissangagivara – uannit isigalugu tamanna kisimi pisusissamisuussaaq.

Siusinnerusukkut Naalakkersuisut Siulittaasuannut, Kim Kielsenimut, nalunngisatsitut avatangiisinut silaannaallu pissusaanut apeqqutini soqutiginnittorujussuarmut Aqqalu Jerimiassenimik inissiinissaa, taamaasillunilu naalakkersuisooqatigiit silaannaap pissusaanut tunngatillugu toraagaannik naqissusiinissaa ujartorsimavara. Tamannali pisimanngilaq, ajuusaarnarporlu. Nunap ersarissunik aquttoqarnissaa pisariaqartinneqangaarpoq, Naalakkersuisunit, aammalu Kalaallit Nunaata nunanut allanut silatuumik piginnaasallu aallaavigalugit isigisinnaasatsitut allanngoriartuutinut annertuunut qanoq iliuuseqarniartunut akuunissaanik qulakkeernittumik.

Print Friendly, PDF & Email