Navigate / search

Aaja danskit kalaallillu innuttaasut naapeqatigiinnerini peqataassaaq

Aaja danskit kalaallillu innuttaasut naapeqatigiinnerini peqataassaaq
Aaja danskit kalaallillu innuttaasut naapeqatigiinnerini peqataassaaq

Inuit Ataqatigiit ukiut tallimat tulleriisiinnarlugit Borholmimi danskit innuttaasut naapeqatigiinneranni peqataassaaq. Ukioq manna Folketingimut ilaasortaq Aaja Chemnitz Larsen (IA), oqallinnerni iliuuseqaateqarnernilu arlaqartuni peqataassaaq. Tamatuma saniatigut Aaja aammattaaq SIK-p demokrati politikkilu pillugit nalliuttorsiualaartitsinerani Nuummi Qassimiuaarnermi aamma peqataasaaq.

Borholmimi ulapaarneqarpoq

Pisarnertut Bornholmimi danskit innuttaasut ulluni tulliuttuni 4-ni naapeqatigiinneranni Aaja Chemnitz Larsen-i aaqqissuussinerni arlalinni peqataassaaq. Ilaatigut Aajap unammeqatigisussaassavaa USA-p Danmarkimi aallartitaa Rufus Gifford, Canadap aallartitaa Francois Giroux, Illersornissaqarfimmiit Nils Wang aammalu Gitte Seeberg, WWF. Taakkua Nunani Avannarlerni Ministeråd-ip aaqqissuussaanik apeqqutit issittumut tunngasut ”Arktiske Jeopardy” unammissutigissammassuk. Aammattaaq Aajap Danmarkimi kalaallit illuutaasa aaqqissuussineranni qulequtaqartoq ”Danmarkimi kalaallit – nukiit unammilligassallu” taamatullu Foreningen Grønlandske Børn-ip qulequtsigaq ”Kalaaliunissannut pikkorippallaarputit” peqataaffigissavai.

Kalaallit innuttaasut naapeqatigiinnerat

Siullermeersumik SIK-p aaqqissuussaannik nunatsinni demokrati politikkilu pillugit, taaguuserneqarsimasoq Qassimiuaarneq, Nuummi ulluni 28, 29 aammalu 30. juni 2016-mi ingerlanneqartussani peqataassaaq.

“Folketingimi naggasiilluni oqallittoqareersorlu Nuummiissimavunga kingorna nunatta kujataaniissimallunga, taakkunani folketingimi sulineq pillugu innuttaasunik assigiinngitsunik isumasioqateqartarsimallunga. Maannakkullu Bornholmimi danmarkimi innuttaasut naapeqatigiinneranni taamatullu nunatsinni Qassimiuaarnermi peqataasussanngorlunga. Aaqqissuussinerit pineqartut tamarmik pitsaasuupput, taamaattumillu qilanaarutigaara taakkunanilu najuuttut oqaloqatigisarnissaanut peqataasarnissamut. Aaqqissuussinerimmi taamatut ittut innuttaasut qanilaarnerusumik naapeqatigiittarnerinut politikkikkullu sulinitsinnut ilisimasaqarnerulernissaanut aqqutissiuussinerupput. Ingammik SIK-p Qassimiuaarneq pillugu isumasioqatigiissitsinera peqataaffigissallugu qilanaaraara” oqaaseqarpoq Aaja Chemnitz Larsen.

Qassimiuaarneq ugguuna paasisaqarnerusinnaavutit: http://www.sik.gl/da/da-qassimiuaarneq/

DK-mi innuttaasut naapisimaarnerat pillugu: https://www.folkemoedet.dk/Sider/default.aspx

Inuit Ataqatigiit Folketingimi ilaasortaatitaat Bornholmimi aaqqissuussinerni ukunani naapinneqarsinnaassaaq:

Naapiguk Folketingimi ilaasortat politikkikkut sumi inissisimanertik apeqqutaatinnagu Suleqatigiiffiat SRSR.

18. juni 12:30 – 14:00 D99 Mobil Event – Qatserisarfiup eqqaani

Susoqassava: Folketingimi suleqatigiit imminnut pituttorsimanngitsut oqallisissiaasa sammissavaat Atoqatigiinneq, kinguaasiorneq, peqqissuseq piginnaatitaaffiillu (SRSR), nunani assigiinngitsuni tamani isumannaatsumik atoqatigiittarneq pillugu ilinniartitaanerit, atoqatigiittarnerni illersuutit, peqqissuulluni naartunerit aammalu isumannaatsumik ernisarnerit eqqartuititsiffigissavai. Takkunniarisi ilaasortallu apeqqutit tamakku pillugit eqqissillusi oqaloqatiginniffigalugit.

Arktisk jeopardy – Issittoq pillugu qanoq ilisimasaqartigaagut?

Nunat Avannarliit sammineqarnerat.

18. juni, 14:30 – 15:30 C2 Nordens Telt – Cirkuspladsen.Allallu. Apeqqutit nunanut allanut tunngasut, silanaap kissatsikkiartornera/avatangiiseq.

Susoqassava: Issittumi pissutsit pillugit pissusiviusut kikkut ilisimasaqarfiginerpaavaat? Inuit tusaamaneqarluartut apeqqutit pillugit unammisinneqassapput, tamatumanilu issittumi apeqqutit pingaarutillit nalinginnaasuunerusullu apeqqutigineqaqattaarnerini peqataasinnaavutit!

Kalaallit danmarkimiittut –Nukiit unammilligassallu

Danmarkimi kalaallit illuisa aaqqissuussaat.

18. juni, 16:00 – 17:00 C19 Danmarkimi Kalaallit Illui – Cirkuspladsen. Oqallinneq. Akuutitaaneq/periarfissallu.

Susoqassava: Isumaqartoqartarpoq kalaallit danmarkimiittut ajunngilluinnartumik atugaqartuusut. Kisiannili pissusiviusut qanoq isikkoqarpat? Kalaallit danmarkimiittut unammilligassaat suuppat aammalu qanoq periarfissaqartigippat?

”Kalaaliunissamut pikkorippallaarputit”

Foreningen Grønlandske Børn/Peqatigiiffik Kalaallit Meerartaat.

18. juni, 19:00 – 19:45 E11 Civiltinget – Kampeløkke Havn. Oqallinneq. Meeqqat inuusuttullu. Akuleruttitsineq/tamaginnullu inissaqartitsineq.

Susoqassava: Tusartakkat nuanniitsut aammalu kalaallit tamarmik taamatut pissuseqartuusutut inissinniarneqartarneri aallaavigineqartarnera kalaalerpassuit atugarliuutigisarpaat, periarfissat assigiinngitsut suuppat. Politikkikkut arlaatigullu ilisimasallit ingerlatsisut oqallitsinneqarnerat, inuusuttunik akoorlugit. Apeqqutigalugu: Qanoq iliorluta nunatsinnik kalaallinillu eqqartuisarnerit nuannersunngortillugit allanngortinniarsinnaavagut?

Print Friendly, PDF & Email