Navigate / search

Aaja Chemnitz Larsen: Siuariartortitsinermi atugarissaarnissamut akissaqarnissaq pineqarpoq

Asseq: Inuit Ataqatigiit Folketingimi

Ullumikkut Grønlands Erhverv-ip Future Greenlandimimk taallugit tallimassaanik ataatsimeersuartitsinera aallarnerneqarpoq. Tamanna Nuummi Katuami pivoq, tassanilu politikerit, namminersorlutik inuussutissarsiornermik ingerlataqartut ilinniagaqartullu inuusuttut naapeqatigiillutik ’Aningaasaatit, Piginnaasat Pisinnaasallu’ qulequtaralugu oqallipput.

Ataatsimeersuarnermi ilaatigut EU kommissæri Margrethe Vestageri aammalu Grønlands Erhverv-ip pisortaa Brian Buus Pedersen ammaasuupput. Taamatuttaaq folketingimi ilaasortaq Aaja Chemnitz Larsen (IA) ataatsimeersuarnerup ulluani siullermi saqqummiussivoq. Saqqummiussinermini nunanit tamalaaniit aningaasaliiffigineqarnissanut pisariaqartitsigaluttuinnarneq naqissuserpaa, assersuutigalugu mittarfiliortiternissanut, soorlu aamma aningaasarsiornikkut siuarsaanikkut kalaallit atugarissaartuunerat nukittorsarneqassasoq.

”Piffissaq sivisooq eqqarsaatigalugu inuussutissarsiornikkut politikkitigut sammivissiinissamik, taamatullu inuussutissarsiutitigut ineriartortitsinissamut siuarsaanissamullu silittunik isumaqatigiissusiornikkut allanngujuissutsimik pilersitsisoqarnissamik pisariaqartitsisoqarpoq” Aaja Chemnitz Larsen ataatsimeersuarnerup ulluisa siullianni oqarpoq.

Taamatuttaaq Kalaallit Nunaata inuerukkiartornera folketingimi ilaasortamit eqqaaneqarpoq. Oqaatigivaa kalaallit Danmarkimi najugaqartut ukiumiit ukiumut amerliartuinnartut, akerlianik Kalaallit Nunaanni innuttaasut ikiliartuinnartut. Kalaallit Nunaat siuariartortitsinermik, aningaasaliissutinik aningaasaatissanillu kissaateqarpat, taava innuttaasut amerliartornissaat pisariaqarpoq.

”Kalaallit Nunaanni ukiut 20-t matuma siortigut ullumikkutulli ikitsigivugut. Taamatullu ingerlaarneq imaaliallaannaq allannguuteqartussanganngilaq. Savalimmiut qiviarutsigit taakkua allaanerusumik ingerlapput. Tassani siuariartortoqarpoq, taamaanneranilu Savalimmiunut angerlartartut amerlanerulersimapput. Taamaattumik aaqqissuusseqqinnerit saniatigut atugarissaarnissamut siuariaateqarnissamullu siuarsaanermik qulakkeerinninnissamut arlalinnik pissutissaqarpoq” Aaja Chemnitz Larseni ersarissumik oqariartuuteqarpoq.

Folketingimi ilaasortap Aaja Chemnitz Larsenip oqalugiaat.

Print Friendly, PDF & Email