Navigate / search

Aaja Chemnitz Larsen-ip L 106 pillugu oqallinnermi oqaaseqarnera

Asseq: Inuit Ataqatigiit Folketingimi

MF Aaja Chemnitz Larsen

Oqaaserineqartut atuupput.

Folketingimi Inuit Ataqatigiinniit inatsisissatut siunnersuut soqutigalutigu atuarsimavarput. Paasivarput inatsisissatut siunnersuut Kalaallit Inatsisartuinit suliarineqartinnagu Folketingimi suliarineqarniartoq. Taamatut killormoortoqarnera tunngaviatigut isornartoqartipparput, isumaqarpugummi Namminersorlutik Oqartussat inatsisaat eqquutsinneqartariaqartoq.

Inatsisissatut siunnersuummi pineqartumi onlinekkut binngornermit, hiistinik qimminillu sukkaniuutsitsinernit kiisalu duinut allakkisartartunut sukkaniutsitsinermit iluanaarutit kisermaassaanerisa atorunnaarsinniarneqarput, tamannalu Kalaallit Nunaanni 2018-mi upernaakkut ataatsimiinnerup nalaani eqqartorneqartussaavoq. Ajuusaarnarporli tamanna Inatsisartunit siusinnerusukkut isummerfineqarsinnaasimanngimmat.

Naalakkersuisut danskit naalakkersuisuinut akissuteqarnissaminnut Inatsisartuniit piginnaatinneqarsimapput. Tamanna Kalaallit Nunaannut 2018-imut Aningaasanut Inatsisissamut siunnersuummi kontomut 40.94.22-imi oqaasertaliussami nr. 87 nr. 2-mi sapaatillu akunnerata matuma siuliani Inatsisartuniit akuersissutigineqartumi pivoq. Tassani onlinekkut bingornerup, hiistinik qimminillu sukkaniutsitsinerit kiisalu duit allakkisarlutik sukkaniutsinneqartarnerisa kisermaanneqarnissaasa attatiinnarneqarusunnerannut Naalakkersuisut nalunaaruteqarnissaminnut  pisinnaatinneqarput. Inatsisissatut siunnersuummi matumani tamanna ukioq naatinnagu pinngippat, taava inatsit pioreersoq Danmarkimeersorlu atuutsinneqassaaq, tamannalu Inatsisartunit suli oqallisigineqannginnera eqqarsaatigalugu naleqquttuunngilaq.

Taamaasilluni upernaami 2018-imi ataatsimiinnermi tamanna Inatsisartunut inatsisissatut Naalakkersuisuniit saqqummiunneqassaaq, pisamilu siunissami Kalaallit Nunaata qanoq isummernissaa Inatsisartuniit saqqummiunneqassaaq.

Taamatut oqaaseqarluta inatsisissatut siunnersuut akuersaarparput.

Print Friendly, PDF & Email