Navigate / search

Aaja Aleqalu: Kalaallit Danmarkimiittut tusarusuppagut

Aaja Aleqalu: Kalaallit Danmarkimiittut tusarusuppagut
Aaja Aleqalu: Kalaallit Danmarkimiittut tusarusuppagut

Danmarkimi tikilluaqqusineq akuutitsinerlu pitsaanerusoq qanoq ililluta angusinnaavarput? Tassaavoq Kalaallit Nunaata Folketingimi ilaasortaatitaasa Danmarkimi nunaqqatiminnut apeqqutissaasa ilaat, uani sapaatip akunnerani Kalaallit illuini Jyllandimiittuni ataatsimiitsitsilerunik.

 

Pingasunngorpat Aalborgimi sisamanngorpallu Aarhusimi Kalaallit Folketingimi ilaasortaatitai ammasumik oqallinnissamut qaaqqusipput, ilaatigut Kalaallit Danmarkimi najugaqartut qanoq pitsaanerusumik Danmarkimi tikilluaqqusaasinnaanerat akuutinneqarsinnaanerallu eqqartorumallugu. Ataatsimiitsitsinissat upernaamut Folketingimi tusarniaanissaq aamma eqqarsaatigalugu aaqqissuunneqarput.

 

Aaja Chemnitz Larsen, Inuit Ataqatigiit: ”Kalaallit maanga nuuttartut eqqarsaatigalugit piaartumik iliuuseqartarnissaq pisariaqarpoq. Ajoraluartumik aamma takusarpagut nunatsinni inuuniarnikkut ingerlalluartuugaluit maanga nuunnermi kingorna ajornatorsiuteqalersartut. Kalaallit Nunaanni inuunermut sanilliutissagaanni Danmarkimi najugaqarneq allaaneroqaaq, inuiaqatigiillu aaqqissuussaanerannut ilisimasaqartuusariaqarpoq nooreersimanermiit piffissap sivisunngitsup iluani ikiorneqarumagaanni inuiaqatigiinnullu akulerulluarumagaanni. Tassa ataatsimiitsitsinerni oqariartuutit misilittakkallu pitsaasut pissarsiarinissaat qilanaareqaara, taakkuussammatami aamma tusarniaarnermi toqqammaviusussat. Tusarniaanerup siunertaraa qallunaat naalakkersuisuisa pitsaanerusumik akuutitsinissaq siunertaralugu suleriusissiamik peqalernissaat” Aaja oqarpoq.

 

Aleqa Hammond, Siumut: ”Inuiaqatigiittut annaasaqaatigissavarput inoqaterput ataaserluunniit nakkaatissappat. Inuiaqatigiinni tamattaalluta pinngitsoortinniagassarivarput nunaqqatitta annertuumik ajornartorsiuteqalersarnerat, taamaattumik oqallinnissanut qaaqqusivugut aamma unammilligassat eqqarsaatigalugit aaqqiissutissat ujartortariaqaratsigit. SFI-p Institut for Menneskerettigheder-nillu nalunaarusiaanni paatsuugassaanngitsumik uppernarsarneqarpoq kalallit Danmarkimi pisortaniit sullinneqarnikkut tunulliunneqartartut. Inunnik isumaginnittut allallu soqutigisat aallaavigalugit sullissisut ajunngilluinnartumik suliniuteqartaraluartut amerlavallaartutigut pisortat sullissiviiniit kingusinaareerluni aatsaat aalaniartoqartarpoq. Suna pitsaanerusumik ingerlanneqartariaqarpa? Aaqqiissutissaq ataasiinnaanngilaq. Isummanik avitseqateqarnissara minnerunngitsumillu innuttaasut uummammiuisa tusarnissaat qilanaareqaara.

 

Kalaallit Danmarkimi najugallit oqallinnermi nukittuumik nipeqarnissaat ataatsimiitsitsinerit siunertaraat. Kalaallit Danmarkimiittut tamarmik eqqarsaatigineqarput – ilinniartut, soraarnerussutisiallit, ilaqutariit meerartallit, suliffillit, suliffissarsiortut il.il.

Ataatsimiitsitsinerit piffissani ataani taaneqartuni ingerlanneqassapput:

Aalborgimi Kalaallit Illuat – Pingasunngorneq 10. februar 2016 –– nal. 16.00

Aarhusimi Kalaallit Illuat – Sisamanngorneq 11. februar 2016 –– nal. 16.00

Københavnimi Kalaallit Illuat – Ataasinngorneq 22. februar 2016 – nal. 17.00

 

Attavissat: Aaja.Larsen@ft.dk oq. +45 3337 5454 | Aleqa.Hammond@ft.dk oq. +45 6162 4670

Print Friendly, PDF & Email